سياسة الخصوصية — كوافيري

إذا كنت صاحب/ة صالون: رقم هاتفك، اسمك، اسم الصالون وعنوانه وصوره، الخدمات والأسعار، ودوام العمل.

إذا كنت زبون/ة عم تحجز: اسمك ورقم هاتفك ووقت موعدك — بس. ما منطلب إيميل ولا عنوان ولا أي شي إضافي.

تلقائياً: معلومات تقنية أساسية لتشغيل الموقع بأمان (نوع المتصفح، وسجلات الأخطاء). لتفاصيل أدوات التحليل، راجع قسم «أدوات التحليل» تحت.

• تشغيل الحجوزات والدور والتذكيرات
• إرسال رمز تحقق (OTP) عبر واتساب عند التسجيل أو استرجاع الحساب
• تحسين المنصة وإصلاح الأعطال

وشو ما منعمل أبداً: ما منبيع بياناتك، ما منشاركها مع معلنين، وما منبعتلك رسائل تسويقية بدون طلبك.

لما تفتح صفحة صالون، منسجّل عنا — مو عند طرف تالت — إنو الصفحة انفتحت، وأي زر انكبس عليها (واتساب، الرقم، الاتجاهات، احجز موعد). ومنسجّل معها: نوع الجهاز والمتصفح، البلد، واسم الموقع يلي إجيت منه (يعني «instagram.com» — بدون الرابط الكامل ولا شي منه).

ما منخزّن رقم الـIP تبعك. منستخدمو للحظة واحدة لنعمل رمز مشفّر يميّز الزيارات عن بعضها بنفس اليوم، والمفتاح يلي منشفّر فيه بيتبدّل كل يوم ومنمحيه — يعني حتى نحنا ما منقدر نربط زيارتك اليوم بزيارتك بكرا، ولا نرجّع الرمز لرقمك. ولهيك كمان ما منقدر نعرف «كم شخص مختلف زار بالشهر»، وهاد مقصود.

الهدف من هالأرقام إنو صاحب الصالون يعرف إذا صفحتو عم توصل للناس. ما منربطها بحسابك ولا باسمك ولا برقمك، وما منبعتها لحدا. وإذا كنت صاحب الصالون وعم تفتح صفحتك إنت، ما بتنعدّ زيارتك أصلاً.

• التصدير: أصحاب الصالونات فيهن يصدّرو سجل زباينهن (CSV) بأي وقت من لوحة التحكم
• الحذف: بتقدر تطلب حذف حسابك وبياناتك من صفحة حذف الحساب، ومنحذفها خلال ٣٠ يوم (باستثناء ما يلزم قانوناً)
• التصحيح: بتقدر تعدّل معلوماتك من حسابك مباشرة